بیر گویرچین کیمی دنسیز له میشم

بولبولم یازدا جمن سیز له میشم

اسکی دن شانلی – شرفلی ائل ایدیم

ظالیمه قارشی آمانسیز سئل ایدیم

زیروه سی چنلی – دومانلی بئل ایدیم

ایندی مدتدی کی چن سیز له میشم

منده اردملی ارن لر یاشامیش

ستارا ؛ بابکه تنلر یاشامیش

او قدر ائل جه بیلن لر یاشامیش

ایندی من ارسیز ؛ارنسیز له میشم

دردمین یوخ آدی ؛ عنوانی دئسم

حیرته دالدیرار انسانی دئسم

باشقا بیر سوزله بو معنانی دئسم

اوز دیاریمدا وطن سیزله میشم

درد منی یاندیریر آمما اودو یوخ

اودور آغزیمدا حایاتین دادی یوخ

دئمیرم دردلر ایچینده آدی یوخ

دئییره م من بئله منسیز له میشم

آی منیم منلیگیم ؛ امدادیما یئت

بیر جه گل من له قوووش دادیما یئت

منی باس باغرینا فریادیما یئت

بیلمیسن کی ؛ نئجه سنسیز له میشم